O 22 de maio tivo lugar a presentación do libro de poesía "A sombra das queirogas" da escritora Dulce Mª López Rivera.
Dulce, exerceu como profesora de Lingua e Literatura no noso instituto e somos moitos, alumnos e profesores, os que queremos felicitala e ao mesmo tempo animarvos para que leades o libro que xa o temos na biblioteca. Aquí a tedes no momento que nos firmaba o exemplar.
O paso por esta zona queda reflitido en algunha das poesías deste libro.
Como mostra aquí tedes este poema " Nos muiños de Batán" no que as verbas serven para describir a beleza deste espazo que moitos de vos coñecedes. E ao mesmo tempo facernos oir o falar da Natureza.
Nos muiños de Batán
A auga caía ruxideira
desde o alto da fervenza.
Camiñabamos por sendeiros
Que teimaban en contar a súa historia.
A lentura das follas secas
penetraba nos nosos corpos.
Ríamos. As raiolas do outono
derretían o estío das palabras.
Chegamos a un corgo remanseado
Que acubillaba unha poza durmida.
Mirámonos. O río calmo
falaba da memoria liquída.
Quen poidese frear o esquecemento,
atrapar a esencia,escribir na auga.
2 comentarios:
A presentación foi moi emotiva e se teño que elexir decántome por:
EMIGRAR
Fun quen de marchar
con granito nos ollos
e cemento na boca
Os vieiros cruzábanse no horizonte
e cada pegada, un aguillón que fería.
Atrás quedaba a lagoa dos soños
onde as palabras eran po dourado
molladas en licor gorentoso.
Canto doe a terra amiga!
Canto gris nos ollos dos que amamos!
Hoxe, o silencio estraño.
Non hai abeiro para acubillar o que queda, só a memoria recobra as transparencias.
As aves sobrevoan os lindeiros da angustia e eu xa me vou afacendo
a vivir nos ermos da nostalxia.
Podería viu un día a visitarnos e lernos algún poema.Un saúdo a todos
Publicar un comentario